Þetta kom fram á samfélagsmiðlinum Reddit. Þar sagði maður einn söguna af því hvernig eiginkona hans varð þunguð af völdum heimiliskattarins, eða öllu heldur átti kötturinn sök á því að hún varð þunguð.
Hjónin höfðu ekki í hyggju að eignast barn en þau áttu eitt og vildu bíða með frekari barneignir. Konan vildi ekki nota getnaðarvarnarpilluna og því notuðust þau við smokka. Smokkar duga nú yfirleitt til að koma í veg fyrir þungun en greinilega ekki ef maður á kött, svona ef miða má við það sem maðurinn sagði.
„Kötturinn okkar er illgjarn snillingur. Ég held í alvöru að þessi litli, loðni, appelsínuguli skítur sé greindari en tæplega eins árs gamalt barn okkar. Hann fer í allt og ég meina allt. Engar dyr, skúffur eða skápar geta stöðvað hann og ef hann veit hvar eitthvað er, þá finnur hann það. Þetta er svo slæmt að ég hélt að það væri reimt í húsinu okkar fyrstu vikurnar eftir að við fengum hann. Á hverjum morgni, þegar ég vaknaði, voru allar skúffur og skápar opnir,“ skrifaði maðurinn.
Einn morguninn sá maðurinn að kötturinn hafði verið að gramsa í skúffunum inni á baði og hafði leikið sér með eyrnapinna. Eyrnapinnar, smokkar og fleira lá út um allt gólf. Maðurinn tók þetta saman og setti á sinn stað og hugsaði ekki meira út í þetta.
Eins og gengur og gerist þá stunduðu hjónin kynlíf og voru þess fullviss að allt væri eins og það átti að vera. En eftir smá tíma byrjaði konunni að vera flökurt og brjóst hennar urðu aum. Hún tók því þungunarpróf og niðurstaðan var að hún væri þunguð.
En hvernig hafði það getað gerst? Þau notuðu alltaf smokk. „Við lögðum höfuðið í bleyti til að finna út hvernig þetta hafði gerst og þá sló þessu skyndilega niður í huga mér. Helvítis kötturinn! Ég hljóp inn á bað og opnaði skúffuna þar sem ég geymi smokkana og tæmdi kassanna til að skoða hvern einn og einasta,“ skrifaði hann.
Þá var grunur hans staðfestur því margir af smokkunum voru með göt eftir klór og smjatt kattarins. Þar með var skýringin á þunguninni komin, smokkarnir voru ekki allir „skotheldir“.
