Ef loftsteinn af þessari stærð lendir í árekstri við jörðina myndi það hafa gríðarleg áhrif um allan heim en sem betur fer eru ekki miklar líkur á slíkum árekstri, svo vitað sé.
Loftsteinninn er í svokölluðum Apollo-flokki loftsteina sem þýðir að braut hans er þannig að hún getur skarast við braut jarðarinnar um sólina. Loftsteinninn hefur auk þess verið flokkaður sem hugsanlega hættulegur af bandarísku geimferðastofnuninni NASA.
En það er ákveðinn léttir fyrir okkur núlifandi að samkvæmt útreikningum NASA mun þessi loftsteinn og ekki neinir aðrir, sem vitað er um, lenda í árekstri við jörðina næstu 100 árin. En hvort afkomendur okkar verða svo heppnir að sleppa við árekstra er síðan annað mál.
Jerusalem Post segir að samkvæmt upplýsingum frá vísindamönnum við Davidson Institute of Science þá geti árekstur loftsteins, sem er rúmlega 140 metrar í þvermál, svarað til þess að orkan sem leysist úr læðingi verði að minnsta kosti 1.000 sinnum meiri en við sprengingu fyrstu kjarnorkusprengjunnar. Ef loftsteinninn er rúmlega 300 metrar í þvermál getur hann eytt heilli heimsálfu.
Loftsteinn sem er rúmlega 1 kílómetri í þvermál getur valdið hnattrænum hörmungum.
