Auk þess að myrða fólk var hann félagi í glæpagengi sem rændi banka, smyglaði sígarettum og seldi vopn.
Hann afplánaði dóminn í JVA Hagen-fangelsinu í Þýskalandi en slapp þaðan 1997 eftir að hafa sagað rimlana á klefa sínum í sundur. Fimm dögum síðar skaut hann öryggisvörð og stal peningum. Hann myrti einnig tvo aðra öryggisverði.
Þýskir lögreglumenn handtóku hann í Albufeira í Portúgal 1999 en honum tókst aftur að flýja með því að saga rimla á fangaklefanum í sundur. Eftir það spurðist ekkert til hans fyrr en á síðasta ári. Þá bárust upplýsingar um að hann hafi sést á Kyrrahafseyjunni Curacao. Mirror skýrir frá þessu.
Haft er eftir lögreglumanninum sem stjórnar leitinni að honum að Franz virðist vera kurteis og greindur. Hann geti auðveldlega heillað konur upp úr skónum og hann vilji ná markmiðum sínum sem eru að komast yfir peninga. Það skipti hann engu máli hvaða aðferð hann þurfi að beita til þess. „Hann er mjög hættulegur,“ sagði lögreglumaðurinn.
Í febrúar á síðasta ári var hann settur á lista Interpol og Europol yfir þá afbrotamenn sem stofnanirnar leggja mesta áherslu á að handsama. Í apríl sá þýskur ferðamaður mann á Curacao sem hann er fullviss um að sé Franz.
Þýska lögreglan hefur heitið 25.000 dollurum í verðlaun fyrir upplýsingar sem leiða til handtöku hans.