Ruslpósthólfið okkar er ekki alltaf bara ruslpósthólf. Þangað ratar stundum tölvupóstur sem á fullt erindi við okkur en póstkerfið flokkar sem ruslpóst. Þetta getur Laura Spears, sem býr í Oakland County í Michigan í Bandaríkjunum, borið vitni um.

Þegar hún skoðaði ruslpósthólfið sitt nýlega beið hennar óvæntur glaðningur. Hún hafði keypt Mega Millions miða í lottói Michigan á gamlársdag. Hún hafði hitt á fimm réttar tölur sem tryggðu henni eina milljón dollara. Að auki var hún með bónustöluna rétta sem þrefaldaði vinningsupphæðina svo í heildina fékk hún þrjár milljónir dollara en það svarar til tæplega 390 milljóna íslenskra króna.

„Ég sá á Facebook að potturinn væri orðinn ansi hár svo ég keypti miða,“ sagði hún í samtali við starfsfólk lottósins.“ Nokkrum dögum síðar var ég að leita að ákveðnum tölvupósti og kíkti því í ruslpóstinn minn. Þá sá ég tölvupóst frá lottóinu um að ég hefði unnið. Ég trúði ekki því sem ég las svo ég fór inn á aðganginn minn hjá lottóinu til að fá þetta staðfest. Það er svo ótrúlegt að hafa unnið þrjár milljónir,“ sagði hún einnig.

Hún sótti vinninginn í síðustu viku. Spears, sem er 55 ára, sagðist ætla að fara fyrr á eftirlaun en hún hafði í hyggju og að fjölskylda hennar muni fá að njóta vinningsins með henni. Hún sagðist líka ætla að kíkja oftar í ruslpóstinn sinn. CNN skýrir frá þessu.