Jótlandspósturinn segir að hægt verði að greiða fyrir demantinn með rafmynt. Hann heitir Enigma og er reiknað með að hann seljist á 5 milljónir dollara en það svarar til um 645 milljóna íslenskra króna.
Hann er nú til sýnis í Dubai í Sameinuðu arabísku furstadæmunum. Hann er 555,55 karöt. Ekki er vitað hver á hann og er að selja hann en sami aðilinn er sagður hafa átt hann síðustu 20 árin. Hann verður fljótlega fluttur til Los Angeles og síðan til Lundúna og verður til sýnis í báðum borgum.
Talið er að demanturinn hafi orðið til þegar loftsteinn lenti á jörðinni fyrir rúmlega 2,6 milljónum ára að sögn Sotheby‘s uppboðshússins sem mun sjá um sölu hans.
Hann er tegundinni carbonado, dökkur og ógagnsær, en það er eitt erfiðasta efnið til að skera í.
Uppboðið fer fram á netinu og hefst 3. febrúar. Það mun standa yfir í sjö daga.
