Víða í hinum vestræna heimi stendur fólki nú til boða að fá örvunarskammt af bóluefnum gegn kórónuveirunni því áhrif þeirra dvína með tímanum. Þessum örvunarskömmtum hefur verið flýtt víða vegna mikillar útbreiðslu Ómíkronafbrigðisins en aldrei fyrr, síðan heimsfaraldurinn brast á, hefur fjöldi smita verið álíka mikill og nú er.
Hópurinn segir að það sé ekki rétta leiðin gegn þeim afbrigðum kórónuveirunnar, sem kunna að koma fram í framtíðinni, að gefa örvunarskammta af bóluefni. Sú aðferð virki ekki til frambúðar. Segir hópurinn að gögn sýni að bóluefnin komi ekki í veg fyrir smit af völdum nýrra afbrigða og betra sé að nota þau til að bólusetja íbúa fátækra ríkja.
WHO segir að faraldurinn á Vesturlöndum auki enn á ójafnvægið í skiptingu bóluefna því með því að gefa örvunarskammt taki Vesturlönd enn meira af bóluefnunum til sín, bóluefni sem ættu að fara til fátæku ríkjanna. Í Evrópu hafa tæplega 80% lokið bólusetningu en í Afríku er hlutfallið 9% og í sumum löndum er það undir 5%.