Það er því hætt við að sjálfsmynd hans sé nokkuð löskuð eftir þetta.
Maðurinn skýrði frá þessu í bréfi til hlaðvarpsins „How to Do It“. Í bréfinu segir hann að eftir að hann smitaðist af kórónuveirunni hafi getnaðarlimur hans skroppið saman um 4 cm. Hann segist hafa verið lagður inn á sjúkrahús í júlí vegna alvarlegra veikinda af völdum COVID-19. „Þegar ég var útskrifaður glímdi ég við risvandamál en það batnaði þegar ég fékk lyf en ég glími við viðvarandi vanda. Getnaðarlimurinn er styttri en áður. Fyrir veikindin var hann yfir meðallengd, ekkert tröll en greinilega yfir meðallagi. Nú hefur hann styst um 4 cm og er greinilega undir meðallengd,“ segir hann að sögn Business Insider South Africa.
Hann segir síðan að læknar hafi sagt honum að þetta sé vegna skemmda á æðum og að mjög líklega sé þetta varanlegt.
Ashley Winter, bandarískur þvagfæralæknir, segir í hlaðvarpinu að rétt sé að risvandamál geti orðið til þess að getnaðarlimur styttist. Þá gangi viðkomandi í gegnum tíma þar sem limurinn getur ekki rétt alveg úr sér og þá flæði ekki blóð inn í hann eins og á að gera og það geti valdið því að hann styttist.
Áður hafa fréttir borist af áhrifum kórónuveirunnar á getnaðarlimi karla. Til dæmis skýrðu franskir læknar frá því sumarið 2020 að maður hefði fengið standpínu í 4 klukkustundir þegar hann lá á sjúkrahúsi og hafi það ekki verið að hans vilja.
Niðurstöður lítillar rannsóknar, sem var birt í ágúst 2021, sýna að COVID-19 getur haft áhrif á getnaðarlimi karla. Sumir hafi glímt við risvandamál eftir smit og segja vísindamennirnir að sýkingin geti hafa takmarkað blóðflæði til getnaðarlims þeirra. Þetta getur síðan valdið því að limurinn styttist af þeim sökum sem Winter nefndi. Hafa læknar jafnvel talað um COVID-typpi.
