Þetta sagði Hans Kluge, svæðisstjóri WHO í Evrópu, á fréttamannafundi í gær. Hann sagði að út frá þeirri smitþróun sem hefur verið síðustu viku áætli Institute for Health Metrics and Evaluation að rúmlega 50% Evrópubúa smitist á næstu sex til átta vikum.
Hann sagði að lönd sem hafa enn ekki lent í bylgju Ómíkronsmita hafi enn tækifæri til að halda aftur af útbreiðslu afbrigðisins með bólusetningum, örvunarskammti og með því að setja bólusetningar viðkvæmra hópa og heilbrigðisstarfsfólks í forgang.
Hann sagði mikilvægt að halda skólum opnum eins og hægt sé.
Ómíkron er nú ráðandi afbrigði í mörgum ríkjum og því hefur útbreiðsla veirunnar verið mikil að undanförnu.
Kluge sagði að margt sé enn óljóst varðandi Ómíkron en þó sé vitað að afbrigðið breiðist gríðarlega hratt út.