Umsátursástand var í Nuuk á Grænlandi síðdegis í gær og fram á kvöld. Þar hafði maður, vopnaður haglabyssu, haft í hótunum. Hann var í íbúð í einu hverfi bæjarins. Lögreglan lokaði stóru svæði og bað fólk um að halda sig fjarri.

Lögreglan reyndi klukkustundum saman að ræða við manninn og fá hann til að leggja vopnið frá sér og gefast upp. Þegar sú leið var fullreynd skaut lögreglan gasi inn í íbúðina til að þvinga hann út og tókst það.

Klukkan 21.26 var maðurinn, sem er 36 ára, handtekinn. Hann hefur áður komið við sögu hjá lögreglunni. Hann hefur verið kærður fyrir hótanir gagnvart lögreglunni.