Bill Gates hefur árum saman verið á toppi listans yfir ríkasta fólks heims eða nærri toppnum. Eins og staðan er í dag er hann í fjórða sæti listans en eignir hans eru metnar á 123 milljarða dollara. Það er nokkuð ljóst að hann mun láta ansi mikil verðmæti eftir sig þegar hann deyr. En hvað verður um auðæfin?

Vitað er að börnin hans þrjú munu fá eitthvað í sinn hlut en þó ekki nema brot af því sem verður til skiptanna.

Gates hefur verið iðinn við að gefa peninga til ýmissa góðgerðarmála og hann hefur heitið því að hann verði búinn að ráðstafa 95% af auðæfum sínum til góðgerðarmála áður en hann deyr. Börnin hans þrjú, þau Jennifer, Rory og Phoebe, munu því ekki deila öllum auðæfunum á milli sín.

Gates hefur þó látið hafa eftir sér að börnin hans muni „aldrei glíma við fátækt“ og að hann muni láta þeim svo mikið eftir að margar kynslóðir afkomenda þeirra muni búa við fjárhagslegt öryggi.