Talið er að 229 kílóa krókódíll hafi drepið 71 árs íbúa í Louisiana eftir að fellibylurinn Ida gekk þar yfir. Krókódíllinn náðist og fundust leifar af manneskju í maga hans. Krókódíllinn er þrír og hálfur metri að lengd.

Í tvær vikur hafði verið leitað að Timothy Satterlee Sr. en hann sást síðast 30. ágúst  þegar hann fór heim til sín í bænum Slidell til að kanna tjón af völdum fellibylsins. Bærinn er um 55 kílómetra norðaustan við New Orleans.

Krókódíllinn náðist á mánudaginn. Nú er verið að rannsaka líkamsleifarnar til að staðfesta að þær séu af Satterlee.

Krókódíllinn var aflífaður eftir að hann náðist í gildru. Síðan var hann skorinn upp og þá fundust líkamsleifarnar.