Virginia Giuffre, 38 ára gömul kona sem staðhæfir að hún hafi verið neydd til kynmaka með Andrew bretaprins er hún var 17 ára, hefur stefnt honum fyrir rétt í einkamáli.
Virginia var undir ægivaldi bandaríska auðkýfingsins og níðingsins Jeffrey Epstein, en Andrew var á meðal margra fyrirmenna sem Epstein vingaðist við. Virginia segir að Andrew hafi verið vel kunnugt um að hún væri þolandi í mansalshring Epstein er hann hafði mök við hana. Andrew neitar því hins vegar að hafa nokkurn tíma hitt Virginiu, hvað þá haft mök við hana. Þó hefur hann sést á ljósmynd með henni frá þeim tíma sem meint atvik á að hafa átt sér stað.
Lögfræðingar Virginiu afhentu lögreglumanni á vakt fyrir utan Windsor-höllina stefnuna. Ekki liggur fullkomlega fyrir hvort afhenda þurfi Andrew stefnuna í eigin persónu til að afhendingin sé gild, en ef svo er þá þarf hann að svara kæruliðum fyrir næstkomandi föstudag. Að sögn lögmanna Virginiu hefur allt verið gert til að koma skjölunum í hendur Andrew en hann lætur ekki ná í sig.
