Tveir lögregluþjónar frá Washington-borg Bandaríkjanna sem voru á vettvangi að bregðast við innrásinni á Bandaríkjaþing í upphafi árs frömdu sjálfsvíg í júlí. Þeir eru nú orðnir fjórir talsins. CNN fjallar um málið.

Gunther Hashida og Kyle DeFreytag voru mennirnir sem létust í júlí. Sá fyrrnefndi hafði starfað hjá lögreglunni frá árinu 2003, en hinn frá 2016. Lögreglan í Washington hefur sent fjölskyldum og vinum þeirra látnu samúðarkveðjur.

Hinir tveir sem létust vegna sjálfsvígs hétu Jeffrey Smith og Howard Liebengood. Báðir höfðu starfað hjá lögreglunni í meira en tíu ár.

Fleiri lögregluþjónar hafa látið lífið í kjölfar árásarinnar. Brian D. Sicknick fékk hjartaáföll og lést daginn eftir að hafa brugðist við árásinni

Meira en 550 einstaklingar hafa verið ákærðir í kjölfar árásarinnar. Í vitnaleiðslu í Bandaríska þinghúsinu í síðasta mánuði sagði lögreglustjórinn í Washington, Harry Dunn að lögregluþjónar ættu ekki að vera hræddir við að leita sér hjálpar.

„Ég vil nota tækifærið til að koma skilaboðum til annara lögreglumanna um tilfinningarnar sem þeir eru að finna fyrir eftir atburðina 6. Janúar. Það er hreinlega ekkert að því að leita sér hjálpar til fagaðila.“ sagði hann og bætti við: „Það sem við gengum í gegn um þennan dag tók verulega á. Ef þér líður illa, þá skaltu notfæra þér þá þjónustu sem er í boði.“