Hvítrússkeski spretthlauparinn Krystsina Tsimanouskaya átti að keppa í 200 m spretthlaupi kvenna á Ólympíuleikunum í Japan í dag. Krystina staðhæfir að fulltrúar frá ólympíusambandi Hvíta-Rússlands hafi komið inn á hótelherbergi hennar, sagt henni að pakka niður í töskur og koma með sér út á flugvöll. Átti að flytja hana nauðungarflutningi til Tyrklands og þaðan til Hvíta-Rússlands.
Á Haneda-flugvellinum í Tokyó leitaði Krystsina, sem er 24 ára gömul, liðsinnis japönsku lögreglunnar og neitaði að stíga um borð í flugvélina. Mannréttindasamtök frá Hvíta-Rússlandi segja að Krystina hafi ekki stigið um borð í flugvélina sem fljúga átti til Istanbul í Tyrklandi.
Krystsina Tsimanouskaya hefur gagnrýnt stjórnvöld í Hvíta-Rússlandi en þar ræður einvaldurinn Alexander Lukashenko ríkjum. Í maí síðastliðnum neyddu yfirvöld í Hvíta-Rússlandi flugvél frá Ryanair, sem var á leið frá Grikklandi til Litháen, til að nauðlenda í Hvíta-Rússlandi, undir yfirskini sprengjuhótunar. Hvítrússneskir leyniþjónustumenn námu þá á brott 26 ára gamlan hvítrússneskan blaðamann og andstæðing stjórnvalda, Roman Protasevich, úr flugvélinni.
Samkvæmt heimildum áðurnefndra mannréttindasamtaka er Krystsina Tsimanouskaya núna í öruggu skjóli en hún dvelst í sendiráði Austuríkis í Tokýó.