Regla sem skyldaði kennara og höfunda kennsluefnis í Texas að kenna það að aðgerðir Ku Klux Klan í suðurríkinu hafi verið siðferðislega rangar var nýverið felld úr gildi af ríkisþingi Texas.
Miklar og háværar deilur hafa staðið undanfarin misseri um hvernig haga skuli sögukennslu, og þá sérstaklega hvað varðar þrælastríðið og samskipti hvítra og svartra í suðurríkjum Bandaríkjanna. Hafa stjórnmálaskýrendur gengið svo langt að gefa deilunni nafn: „Classroom culture wars,“ eða kennslustofu kúltúr stríðið.
Greinin sem um ræðir lifði reyndar ekki lengi í löggjöf ríkisins, en hún var samþykkt og undirrituð af ríkisstjóranum Greg Abbott í síðasta mánuði. Sem fyrr segir skyldaði greinin kennara og höfunda kennsluefnis til þess að koma sögulegu efni til skila á ákveðinn hátt. Áttu kennarar þannig að kenna sögu hugmynda um yfirburði hvíta kynstofnsins og þar með talið þrælahald, andstöðu við blöndun kynþátta og Ku Klux Klan hreyfinguna með ákveðnum hætti. Voru kennararnir skyldaðir til þess að koma efninu þannig til skila að þessi hugmyndafræði hafi verið siðferðislega röng.
Repúblikanir, sem sumir hverjir kusu með upphaflegu lögunum, segja nú að ákvæðið sé um leið of víðtækt og óskýrt. Nú vilja þeir koma öðruvísi ákvæði í gegn, en þingið í Texas er fast í pattstöðu vegna flótta þingmanna Demókrata úr ríkinu vegna deilna um umdeildar breytingar á kosningalögum. Andstæðingar breytingatillagnanna segja þær miða að því að takmarka rétt svartra til þess að kjósa.
Segja þeir þingmenn sem nú vinna að frumvarpi að nýjum lögum um sögukennslu í ríkinu, að réttara væri að sleppa því að tilgreina sérstaklega hvað eigi að kenna og hvernig, og leyfa kennurum í ríkinu að ákveða það, hver fyrir sig. Hefur The Times eftir Dan Patrick, aðstoðarríkisstjóra Texas að „foreldrar vilji að börnin þeirra læri að hugsa gagnrýnið, en ekki láta planta í sig vinstri hugmyndafræði sem segir að Bandaríkin eigi rætur sínar að rekja í rasisma.“
