Ákvörðunin um þetta var tekin í stjórnmálanefnd kommúnistaflokksins en ekki liggur fyrir hvenær hún tekur gildi. Xinhua, ríkisfréttastofan, segir að ákvörðunin sé tekin til að bregðast við hækkandi meðalaldri þjóðarinnar. Xi Jinping, forseti, er formaður stjórnmálanefndarinnar.
Fyrir fimm árum var lögum breytt og fólki heimilað að eignast tvö börn. Það varð til þess að fæðingum fjölgaði en aðeins um skamma hríð og síðan hefur þeim farið fækkandi.
Sérfræðingar segja að eftir fjörutíu ár með þá reglu að aðeins mætti eignast eitt barn hafi stór hluti þjóðarinnar vanist því að samfélagið sé byggt upp á litlum fjölskyldum.
Kínverjar eru nú um 1,4 milljarðar en færri fæðingar og hækkandi meðalaldur skapa vandamál. Samkvæmt síðasta manntali eru um 264 milljónir landsmanna 60 ára eða eldri. Það þýðir að tæplega fimmti hver landsmaður er 60 ára eða eldri.
Kommúnistaflokkurinn greip nýlega til aðgerða til að reyna að fá fólk til að eignast fleiri börn. Fólki hefur verið gert erfiðara fyrir með að skilja í þeirri von að það auki áhuga þess á að búa til börn.