Sjónvarpsfréttaþulur í Zambíu rauf útsendingu til að segja áhorfendum frá því að hann hefði ekki fengið útborgað og ekki heldur vinnufélagar hans. „Við erum manneskjur,við verðum að fá borgað,“ sagði hann. Fréttavefurinn Metro greindi frá.
Það var síðastliðið laugardagskvöld sem fréttaþulurinn Kabinda Kalimina var að lesa fréttir kvöldsins er hann stöðvaði skyndilega lesturinn og kom með þessa sérstæðu tilkynningu.
Rétt eftir að Kalimina hafði flutt þessa yfirlýsingu sína var klippt frá fréttasettinu og yfir í upphafsstef fréttatímans.
Framkvæmdastjóri sjónvarpsstöðvarinnar sakar Kalimina um að hafa verið drukkinn í útsendingu. Hefur hann fordæmt fréttamanninn í Facebook-færslu. Í sömu tilkynningu hrósaði hann öðrum á ritstjórn fréttastofunnar og sagði hópinn vera afar hæfileikaríkan og fagmannlegan. Þess vegna hefði hegðun Kalimina verið úr takti við það sem tíðkast hjá þessum hópi.
Kalimina varði hegðun sína á Facebook og sagði að þó að fréttamenn væru hræddir við að tala þá ættu þeir samt að gera það. Ekki hafa fengist svör frá sjónvarpsstöðinni við ásökunum Kalimina um að ekki hafi verið greidd út laun.
Atvikið má sjá í spilaranum hér að neðan.
