Ný sönnunargögn gegn Christian Brückner, manninum sem grunaður er um að hafa myrt stúlkubarnið Madeleine McCann, vorið 2007, hafa nú komið fram. Eru þau sögð mjög veigamikil.

Madeleine hvarf úr hótelíbúð í Algarve í Portúgal vorið 2007 er foreldrar hennar, bresk læknahjón, sátu að snæðingi á veitingastað rétt hjá. Gerðist þetta rétt fyrir fjögurra ára afmælisdag stúlkunnar.

Þjóðverjinn Christian Brückner var þá búsettur á svæðinu. Hann situr nú í fangelsi í Þýskalandi og afplánar dóma fyrir kynferðisbrot. Í fyrrasumar lýsti þýska lögreglan því yfir að hún hefði Brückner grunaðan um að vera valdur að hvarfi barnsins. Jafnframt sagði lögreglan að hún teldi að Madeleine litla væri dáin.

Allar götur síðan hafa Þjóðverjarnir reynt að safna sönnunargögnum gegn Brückner en það hefur gengið hægt og ekki hefur komið nægilega mikið fram til að hægt væri að ákæra hann fyrir glæpinn.

Núna eru hins vegar komin fram ný sönnunargögn gegn honum sem eru sögð vera mjög veigamikil. Frá þessu greinir saksóknarinn Hans Christian Wolters í viðtali við berska miðilinn The Sun. Wolters segist því miður ekki geta gefið upp hver sönnunargögnin eru. Ekki sé um réttarlæknisfræðileg gögn að ræða heldur mjög sterk óbein sönnunargögn. Wolters segir enn fremur:

„Við höfum ávallt staðhæft að maðurinn sem grunurinn beinist helst að í málinu hafi framið glæpinn og við erum ekki að leita að neinum öðrum sakborningum. Við höfum ekki fundið nein gögn sem benda til þess að hann sé ekki sekur um þennan glæp en ég má ekki fara út í smáatriði.“

Wolters segir bjartsýnn á að málið verði leyst.