Afar hrollvekjandi myndir hafa vakið athygli í dag en um er að ræða myndir frá Indlandi. Þar gengur virkilega illa að ráða niðurlögum kórónuveirufaraldursins en þúsundir látast nú á hverjum degi í landinu vegna veirunnar. Alls hafa tæplega 200 þúsund látið lífið vegna veirunnar síðan faraldurinn hófst en 17,6 milljón manns hafa greinst með veiruna í landinu.

Myndirnar sem um ræðir vöktu athygli The Sun á Bretlandi en á myndunum má sjá lík þeirra sem létust vegna veirunnar bíða í röðum. Líkbrennslur vinna nú allan sólarhringinn við að brenna lík þeirra sem látast vegna veirunnar í landinu. Á myndunum má sjá fjöldann allan af líkömum sem bíða eftir að verða brenndir. Þá má einnig sjá fjölskyldur þeirra sem hafa tapað baráttunni við veiruna skæðu.

Læknirinn Shaarang Sachdev segir að faraldurinn sem geisar í landinu núna sé sá versti sem þau hafa séð til þessa. „Næstu tvær vikur verða eins og helvíti fyrir okkur.“