Furðulegt mál á Ítalíu hefur nú vakið heimsathygli en þar freistaði karlmaður þess að komast hjá bólusetningu, en fá engu síður vottorð um að vera bólusettur, með því að mæta til bólusetningar með gervihandleggi. Hann á nú yfir höfði sér kæru fyrir svik.

Talið er að maðurinn hafi borgað tugi þúsunda til að verða sér úti um silíkon-gerviútlimi. Atvikið átti sér stað á bólusetningarútibúi í bænum Biella á Ítalíu og í kjölfar þess að yfirvöld á Ítalíu tilkynntu hertar aðgerðir sem meina óbólusettum að mæta á ýmsa viðburði.

Maðurinn mætti, eins og aðrir, í bólusetningu. Skrifaði undir upplýst samþykki fyrir bólusetningunni með nafni og öllu, settist svo niður, lyfti upp erminni á skyrtu sinni og beið þess að fá stunguna.

Starfsmaðurinn sem sá um manninn tók fyrst ekki eftir því að ekki væri allt með felldu þar sem silíkon útlimurinn var nokkuð sannfærandi. En við nánari athugun bað starfsmaðurinn manninn að fara úr skyrtunni.

Maðurinn gerði sér grein fyrir að þarna kæmist upp um hann og reyndi án árangurs að sannfæra heilbrigðisstarfsmanninn um að klára bara bólusetninguna og láta sem ekkert væri.

Starfsmaðurinn, Filippa Bua, segir að fyrst hafi hún vorkennt manninum.

„Fyrst vorkenndi ég honum, hélt að hann væri með gerviútlim og velti því fyrir mér hvort ég hefði óvart beðið hann að rétta mér vitlausan handlegg. En svo viðurkenndi hann að hann væri viljandi með gervihandlegg til að komast hjá því að vera bólusettur.“

Við þetta varð Filippa sármóðguð og segist aldrei hafa vitað annað eins á rúmlega þrjátíu ára ferli sínum sem hjúkrunarfræðingur.

„Fyrst varð ég hissa, síðan varð ég reið. Mér fannst vegið að starfsheiðri mínum, hann sýndi gáfum okkar og starfi vanvirðingu. Aldrei í lífi mínu hefði ég búist við þessu.“

Yfirvöld í héraðinu Piedmont, þar sem atvikið átti sér stað, hafa fordæmt athæfið.

„Þetta mál gæti flokkast sem „fáránlegt“ ef ekki væri fyrir að um er að ræða gífurlega alvarlegt uppátæki sem er algjörlega óásættanlegt fyrir samfélag sem er nú þegar búið að fórna miklu út af faraldrinum.“

Forseti héraðsins, Alberto Cirio, gekk lengra í annarri yfirlýsingu og sagði að málið væri „móðgun við heilbrigðiskerfi héraðsins“.