Penticton er í Bresku Kólumbíu í vesturhluta landsins. Armel Castellan, veðurfræðingur hjá Environment Canada, sagði í gær að hitametið hafi verið jafnað á miðvikudaginn.
Penticton er nokkur hundruð kílómetrum suðaustan við bæinn Lytton sem komst í heimsfréttirnar í sumar þegar hitamet var sett þar en þá mældist hitinn 49,6 gráður. Nokkrum dögum síðar varð bærinn illa úti í skógareldum. Tveir íbúar létust.
Miklir hitar voru í Bresku Kólumbíu í sumar, óvenjulega miklir. Þeir eru taldir afleiðing loftslagsbreytinganna en heitt loft „festist“ vegna háþrýstisvæða yfir vesturhluta Kanada og vesturhluta Bandaríkjanna.
Hitabylgjan kynnti enn frekar undir skógareldum og margir létust í eldunum.
Castellan sagði að síðan í september hafi mikill hiti legið yfir svæðinu en hann komi frá hitabeltissvæðum.
Þessi hiti hefur einnig náð til norðvesturhluta Bandaríkjanna en þar hafa hitamet verið slegin eða jöfnuð í Washington, Montana, Wyoming og Norður-Dakóta. Í Omaha í Nebraska mældist 20 gráðu hiti í gær en það er hitamet í desember þar um slóðir.