Fimm nemendur í Tårnby menntaskólanum á Amager í Kaupmannahöfn voru fluttir á sjúkrahús á tíunda tímanum í morgun. Hundar sluppu þá inn í skólann og bitu nemendur. Talið er að tveir hundar hafi sloppið inn. Annar Schæfer en hinn blendingur af óljósum uppruna. Þegar lögreglan kom á vettvang var annar hundurinn mjög árásargjarn og drógu lögreglumenn upp  skotvopn og skutu hann.

Ekki er vitað hvort hundurinn er dauður en hann slapp á brott en vitað er að lögreglumenn hæfðu hann.

B.T. hefur eftir Mikkel Harder Sørensen, rektor, að hundar hafi hlaupið inn í skólann um klukkan 9 og bitið nokkra nemendur. Hann segir þetta hafi verið skelfilegan atburð. Bæði lögregla og sjúkralið voru kölluð á vettvang. Hann sagðist telja að nemendurnir hafi ekki slasast alvarlega en að vonum hafi þeim brugðið illa.

Lögreglan skýrði frá því á Twitter að lögreglumenn hafi skotið á annan hundinn  þegar þeir komu á vettvang þar sem hann hafi verið mjög æstur og árásargjarn.

B.T. hefur eftir nemanda í skólanum að hann hafi séð annan nemanda koma hlaupandi eftir ganginum með Schæferhund á hælunum. Aðrir nemendur hafi þá hlaupið öskrandi á brott.

Annar nemandi sagði að hundarnir hafi fyrst ráðist á nemendur sem voru í snjókasti á skólalóðinni og síðan hafi þeir elt þá inn.

Ekki er vitað hvaðan hundarnir komu eða hver á þá en verið er að rannsaka málið.