Birgitte Cleroux er með ansi þétta ferilskrá þegar kemur að því að vinna sem hjúkrunarfræðingur, sérstaklega í ljósi þess að hún er ekki hjúkrunarfræðingur.
Þessi ekki hjúkrunarfræðingur notaði nafn konu sem er í alvörunni hjúkrunarfræðingur til að fá vinnu sem slíkur á sjúkrahúsi í Vancouver Kanada. Hún hætti í þeirri vinnu í júní á þessu ári en hún er sögð hafa tekið að sér stöðu hjúkrunarfræðings á annarri heilbrigðisstofnun í Ottowa í Kanada.
CBC fjallaði um málið en þetta er ekki fyrsta rodeó Birgitte í persónustuldi. Samkvæmt gögnum úr dómskrám þá hefur hún stundað slík svik undanfarin 30 ár. Birgitte, sem er 49 ára gömul, reyndi að verða hjúkrunarfræðingur á sínum tíma en hún kláraði aldrei námið.
Búið er að kæra Birgitte í Ottowa fyrir líkamsárás og glæpsamlegt gáleysi. Hún er sögð hafa sprautað fólk en hún er alls ekki hæf til þess. Í Vancouver er ekki enn búið að kæra hana þar sem málið er enn í rannsókn en yfirvöld eru að reyna að ganga úr skugga um hversu marga sjúklinga hún aðhlynnti.
Birgitte virðist vera nokkuð fjölhæf þar sem hún hefur ekki bara þóst vera hjúkrunarfræðingur, hún hefur einnig þóst vera vísindakennari. Hún hefur ekki bara landað störfum í Vancouver og Ottowa heldur einnig í Alberta og Ontario.