Það var öryggisvörður sem var skotinn til bana þegar hann reyndi að koma í veg fyrir að ræningjar gætu stolið upptökubúnaði hjá KRON-TV sjónvarpsstöðinni. Þetta gerðist þegar hópur ræningja lét til skara skríða gegn verslun með lúxusvarning í Oakland í Kaliforníu. Kvikmyndatökulið mætti þangað til að taka upp það sem var að gerast.
Rán af þessu tagi hafa verið sérstaklega áberandi í Kaliforníu. Hópar ræningja, sem eru vopnaðir piparúða, hömrum og öðrum vopnum, hafa ráðist inn í verslanir og nánast tæmt þær.
Þessi rán hafa gengið svo hratt fyrir sig að lögreglan hefur ekki náð að bregðast við áður en ræningjarnir eru á bak og burt.
Þessi tegund rána komst í fréttirnar af alvöru fyrir rúmri viku þegar nokkrar verslanir, til dæmis Louis Vuitton, Fendi, Yves Saint Laurent, Burberry og Dolce & Gabbana í San Francisco voru rændar á einu kvöldi. Verðmæti þýfisins er talið vera sem svarar til um 130 milljóna íslenskra króna.
Tveimur dögum síðar létu um 80 grímuklæddir ræningjar til skara skríða gegn Nordstrom vöruhúsinu í Walnut Creek utan við San Francisco. Þeir komu á vettvang í um 25 bílum um klukkan 20.45 þegar komið var að lokun. Þeir ruddust inn og hræddu viðskiptavini og starfsfólk á brott með því að sveifla vopnum og nota piparúða. Þrír starfsmenn slösuðust.
Lögreglan telur að vel skipulögð glæpasamtök standi á bak við þessi rán.