Heilinn þinn elskar að fara í göngutúr. Þegar þú gengur rösklega myndast nýjar heilafrumur og svæði heilans eiga auðveldara með samskipti sín á milli. Ef þú gengur 10 km á viku bætir þú minnið og heldur heilanum á tánum og það til lengri tíma. Ef þú ert í þeirri stöðu að eiga erfitt með að finna lausn á einhverju þá er gott að skella sér í göngutúr en rannsóknir hafa sýnt að göngutúr eykur sköpunargáfuna um 60% miðað við að sitja kyrr. Engu skipti hvort gengið var inni eða úti.
Það hefur auðvitað áhrif á þyngdina að fara í göngutúr. Líkaminn brennir aðallega fitu vegna þess hversu lítill hraðinn er og það gerir að verkum að það eru fitukeppirnir sem líkaminn gengur á en ekki kolvetnabirgðirnar. Þetta veldur því að þú finnur ekki til hungurs og missir þig því síður í ísskápnum þegar heim er komið. Hungur lætur ekki eins mikið að sér kveða ef gengið er á fitubirgðirnar eins og þegar gengið er á kolvetnabirgðirnar sem skila okkur orku.
Það er gott fyrir liðina að fara í göngutúr í staðinn fyrir að hlaupa. Þegar hlaupið er verða liðirnir fyrir mörgum höggum en í göngutúr er annar fóturinn alltaf á jörðinni og þú sleppur við að þeir „svífi“ yfir jörðinni og lendi harkalega sem veldur auknu álagi á líkamann.
Hjartað nýtur auðvitað góðs af göngutúr og því snjallt að fara reglulega í einn slíkan. Göngutúr örvar blóðrásina og vöðvana svo blóðþrýstingurinn og blóðfitan lækka og hjartað styrkist.
Beinin njóta einnig góðs af göngutúr. Líkurnar á beinþynningu í mjöðmunum minnka um 40% ef þú stundar gönguferðir. Ef þú vilt styrkja beinin enn frekar þá er mælt með göngutúrum í ósléttu umhverfi, til dæmis brekkum og hæðum og hólum.
