Danska ríkisstjórnin vill leigja 300 fangelsisrými erlendis til að draga úr þrýstingi á dönsk fangelsi en langir biðlistar eru eftir að komast í afplánun og föngum fjölgar á sama tíma og fangavörðum fækkar og illa gengur að ráða fólk til starfa í fangelsunum. Það mun kosta um einn milljarð danskra króna að leigja 300 fangelsisrými erlendis í fjögur ár.

Þetta kemur fram í leynilegu minnisblaði ríkisstjórnarinnar sem Politiken hefur komist yfir.

Tillaga ríkisstjórnarinnar er liður í yfirstandandi samningaviðræðum flokkanna á danska þinginu um fyrirkomulag fangelsismála næstu árin. Politiken segir að enn hafi ekkert eitt land verið nefnt sérstaklega til sögunnar sem hugsanlegt móttökuland fyrir danska fanga.

Einingarlistinn og Radikale Venstre, sem eru stuðningsflokkar minnihlutastjórnar Jafnaðarmanna, gagnrýna tillöguna en viðurkenna að nauðsynlegt geti verið að grípa til þessa ráðs.

Á hægri vængnum eru Venstre, Íhaldsmenn og Danski Þjóðarflokkurinn jákvæðir í garð tillögunnar.