Afar fágæt vinnuskjöl með glósum vísindamannsins Albert Einstein seldust á uppboði í París í gær fyrir um 11,7 milljónir evra eða um 1,7 milljarð króna. Það var uppboðshúsið Christie´s sem hafði umsjón með uppboðinu en söluverðið var fjórfalt á við það sem gert var ráð fyrir.
Í skjölunum, sem voru alls um 54 síður, mátti finna handskrifaðar glósur vísindamannsins um afstæðiskenninguna sem hann birti formlega árið 1915.
Rare #Einstein papers set record at Paris auction https://t.co/yxStR6CAbU
— Phys.org (@physorg_com) November 23, 2021
Í yfirlýsingu frá uppboðshúsinu kemur fram að þetta séu verðmætustu skjöl eftir Einstein sem nokkru sinni hafi verið seld á uppboði. Það hafi ekki verið ætlun vísindamannsins að varðveita þau og því sé hreint kraftaverk að þau séu til í dag. Ekki kemur fram hver kaupandi skjalanna er.
Fram kemur að vinnuskjölin séu frá árunum 1913 og 1914 þegar Einstein starfaði í Zurich og í þeim er einnig að finna skrif vinar hans og samstarfsfélaga, svissneska verkfræðingsins Michele Besso. Um er að ræða vangaveltur þeirra um ýmis stór vísindaleg málefni og því algjör fjársjóður fyrir þá sem vilja fá innsýn inn í huga tveggja ótrúlegra vísindamanna.