Hugulsöm amma ákvað að gleðja barnabarnið með því að prjóna „hákarlsteppi“ handa honum og lét hendur standa fram úr ermum. Hún gat ekki séð að neitt gæti farið úrskeiðis í þessu, teppið myndi gleðja strákinn og hann gæti skriðið undir það þegar komið væri að kósýstund heima við. En þetta fór nú svolítið úrskeiðis hjá henni þrátt fyrir að teppið líkist hákarli, svona að mestu.

Þetta gerðist fyrir nokkrum árum en sagan af prjónaskap ömmunnar fór nýverið aftur á flug á netinu enda ansi spaugileg.

Þegar amman var að prjóna vildi hún auðvitað að teppið líktist hákarli sem mest og því gerði hún auðvitað ugga á það en hún gleymdi að hugsa út í staðsetningu hans þegar einhver liggur undir teppinu. Eins og sjá má á myndinni hér fyrir neðan þá er staðsetningin ansi óheppileg.

Myndin vakti að vonum mikla athygli á netinu og margir hafa deilt henni og tjáð sig um hana en óhætt er að segja að mistök ömmunnar séu sprenghlægileg.