Katalin Erzebet Bradacs, 44 ára gömul fyrrum klámstjarna frá Ungverjalandi, var á dögunum handtekin en hún er grunuð um að hafa myrt Alex Juhasz, tveggja ára gamlan son sinn. Þá er hún einnig sögð hafa limlest hann og skilið líkið eftir við afgreiðslukassa í matvöruverslun. DailyStar fjallaði um málið.
Þann 1. október síðastliðinn fór Katalin í matvöruverslun Lidl í Citte della Pieva á Ítalíu með syni sínum. Vitni heyrðu Katalin öskra og sáu hana leggja blóðugt lík sonar síns á afgreiðslukassann á meðan hún öskraði á hjálp. Sonur hennar var með níu stungusár á líkamanum, bæði á bringunni og á hálsinum. Hann var úrskurðaður látinn á staðnum og Katalin var handtekin eftir að hnífur fannst í veskinu hennar.
Rifinn og blóðugur bolur í eigu Juhazs fannst í nærliggjandi byggingu og eftir að hafa skoðað myndbönd úr öryggismyndavélum grunar lögregluna ekki neinn nema móður hans um morðið. Morðið sjálft náðist ekki á myndband en Katalin sást bæði mæta á vettvang og fara af honum.
Lögreglan telur að Katalin hafi myrt son sinn til að hefna sín á barnsföður sínum, Norbert Juhasz, en þau höfðu skilið skömmu áður og verið í hatrömmum forsjárdeilum. Katalin stakk af í síðasta mánuði með syni sínum eftir að Ungversk dómsvöld höfðu úrskurðað að faðir barnsins ætti að fá fulla forsjá.
Norbert býr í Ungverjalandi en hann hafði samband við lögreglu eftir að hafa fengið senda mynd af syni sínum að deyja í gegnum samskiptaforritið WhatsApp. Katalin á að hafa sent myndina skömmu áður en hún fór í matvöruverslunina með blóðugt líkið.
Katalin er sögð hafa þvertekið fyrir morðásakanir. „Ég drap ekki son minn,“ á hún að hafa endurtekið í samtali við lögreglu. Þá eru vitni sögð hafa séð Katalin misþyrma syni sínum degi fyrir morðið.