Þetta kemur fram í viðtali BBC við manninn sem er nefndur Kim Kuk-song en það er væntanlega ekki hans rétta nafn. Hann flúði til Suður-Kóreu fyrir sjö árum en þrátt fyrir að svo langt sé um liðið frá flótta hans óttast hann enn að yfirvöld í Norður-Kóreu nái til hans.
BBC segir að þetta sé í fyrsta sinn sem svo háttsettur Norður-Kóreumaður veitir fjölmiðlum viðtal. BBC gat ekki staðfest allt sem hann sagði en hægt var að staðfesta hver hann er og einnig fundust sannanir sem styðja það sem hann segir um einræðisstjórnina.
Hann eyddi 30 árum í að vinna sig upp innan norðurkóresku leyniþjónustunnar. Þar segist hann hafa stjórnað hryðjuverkahópi sem Kim Jong-un, einræðisherra, setti á laggirnar til heiðurs föður sínum, Kim Jong-il, á meðan hann var enn á lífi. Verkefni hópsins var að myrða flóttamenn og þá sem gagnrýndu stjórnvöld. Hann sagði BBC að í Norður-Kóreu séu hryðjuverk pólitískt verkfæri sem er notað til að tryggja stöðu Kim Jong-un.
Stjórnvöld í Norður-Kóreu neita alltaf ásökunum þegar þau eru tengd við eitthvað neikvætt sem gerist á alþjóðavettvangi. En Kim Kuk-song benti á tvo atburði sem hann segir að hafi átt sér stað eftir fyrirskipun frá æðstu stöðum. Annar er að árið 2010 var tundurskeyti skotið á suðurkóreska herskipið Cheonan. 46 létust. Norður-Kórea neitaði að hafa verið að verki. Síðar þetta sama ár skutu Norður-Kóreumenn á suðurkóresku eyjuna Yeonggpyeong. Tveir hermenn og tveir óbreyttir borgarar létust. „Í Norður-Kóreu er ekki hægt að leggja veg án leyfis frá æðsta leiðtoganum. Skotárásin á skipið og skotárásin á eyjuna hefðu aldrei átt sér stað að frumkvæði lágt settra. Svona aðgerðir eru gerðar eftir fyrirskipun Kim Jong-un,“ sagði hann.
Meirihluti norðurkóresku þjóðarinnar býr við afar þröngan kost, fátækt og matarskort. En það er mikilvægt í huga einræðisstjórnarinnar að viðhalda lúxuslífsstíl einræðisherrans. Kim Kuk-song sagði að til þess að það sé hægt sé ýmsum aðferðum beitt.
Þegar mikil hungursneyð skall á landinu árið 1990 var honum fyrirskipað að útvega þáverandi einræðisherra, Kim Jong-il, fé til að hann gæti viðhaldið lúxuslífi sínu. Þetta var leyst með því að hefja framleiðslu á metamfetamíni sem var síðan selt fyrir dollara.
Kim Kuk-song skýrði einnig frá umfangsmikilli vopnaframleiðslu og að meðal annars séu vopn seld til ríkja þar sem borgarastríð geisar.
