Donald Trump Bandaríkjaforseti var í gær bannaður frá samfélagsmiðlinum Twitter vegna áhyggna um að hann nýtti vettvanginn til að hvetja til óeirða og ofbeldis. Um var að ræða persónulegan Twitter-reikning forsetans.
Trump hefur ekki tekið þessu þegjandi og hljóðalaust heldur fór hann á opinberan Twitter-reikning forsetaembættisins og skrifaði þar að Twitter séu sífellt að ganga lengra og lengra í því skerða tjáningarfrelsi og vinni með öfga vinstri sinnuðum, sem og demókrötum, að því að þagga niður í forsetanum.
Eins sagði Trump að hann sé að skoða að opna sinn eigin samfélagsmiðil.
„Við erum líka að skoða möguleikana í því að opna okkar eigin vettvang í náinni framtíð. Við munum ekki láta þagga niður í okkur. Twitter er sama um tjáningarfrelsi. Þeir vilja frekar vera öfga vinstri vettvangur þar sem nokkrar af skelfilegustu manneskjum heimsins fá að tjá sig eftir eigin hentisemi.“
Twitter eyddi færslunni út og talsmaður fyrirtækisins hefur sagt að unnið sé að því að koma í veg fyrir að forsetinn geti nýtt opinberan aðgang forsetaembættisins.
Trump reyndi einnig að nýta Twitter-reikning stuðningsmanna sinna, en eftir að sá reikningur birti færslu sem innihélt yfirlýsingu frá forsetanum þá var þeim reikning einnig lokað.
