Simone Norowzian, 21 árs gamall nemi við Oxford-háskóla, lést nýlega eftir hræðilegt slys. Simone hafði verið úti að skemmta sér með félögum sínum en hún gekk óvart fram af bjargi og lést í kjölfarið.

William Hayman, vinur Simone, ræddi við Kent Online um þetta sorglega slys en hann sagðist hafa heyrt stutt og hátt öskur skömmu eftir að Simone féll fram af bjarginu. Viðbragðsaðilar mættu á svæðið en Simone var úrskurðuð látin á vettvangi. Fjölskylda Simone hvetur nú yfirvöld til að koma í veg fyrir að svona slys gerist aftur en fjölskyldan vill meina að hægt hafi verið að koma í veg fyrir þetta skelfilega slys.

Simone hafði farið út til að reykja sígarettu fyrir svefninn en hún fór út ásamt William. Fyrr um kvöldið höfðu þau og fleiri vinir farið á bar til að drekka saman áfengi en fóru síðan í íbúð sem hún leigði til að spila samkvæmisleiki. William segir að Simone hafi verið mjög drukkin þegar þau fóru út til að reykja saman. „Hún var um 10 metrum á undan mér og gekk að grindverkinu á brúninni. Ég öskraði á hana og sagði að þarna væri bjarg og svo heyrði ég stutt, hátt öskur,“ segir William.

„Það fyrsta sem ég gerði var að kalla nafnið hennar aftur og aftur. Svo náði ég sambandi við bíl sem var að keyra framhjá og fékk ökumanninn til að hringja á sjúkrabíl. Eftir að sjúkrabíllinn kom gekk ég nær til að sjá Simone en það var of dimmt. Ég veit fyrir víst að hún ætlaði ekki að stökkva fram af.“

Claire, systir Simone, ræddi líka um slysið. „Hún átti allt lífið framundan,“ sagði Claire. „Hún gat augljóslega ekki metið hættuna. Hún hélt að hún væri að klifra yfir til að komast niður á ströndina. Við erum viss um að það hefði verið hægt að koma í veg fyrir þetta. Það þarf að koma í veg fyrir að svona slys gerist aftur,“ sagði Claire einnig og á þá við þá litlu birtu og skort á varúðarskiltum við brúnina.