Bjarki Sigurðsson skrifar:
Lögreglan í Napólí á Ítalíu fann í dag 500 ára málverk og skilaði því aftur á safnið sem það á heima á, án þess að safnið vissi að það væri stolið. Lögreglan gerði húsleit hjá 36 ára manni sem var grunaður um að hafa aðra ránsfengi heima hjá sér og fann þar eftirlíkingu af verki Leonardo da Vinci, Salvator Mundi, sem talið er að einn nema hans hafi málað.
Upprunalega verkið er dýrasta málverk sögunnar eftir að það var selt á 450 milljón dollara á uppboði árið 2017, en talið er að kaupandinn hafi verið Mohammed bin Salman, krónprins Sádí Arabíu, sem reyndi að kaupa knattspyrnuliðið Newcastle United í fyrra en fékk ekki eftir að rannsóknir á honum hjá enska knattspyrnusambandinu leiddu lítið gott í ljós. Málverkið hefur ekki sést síðan þá og hann er sagður geyma það í glæsilegri einkasnekkju sinni.
Eftirlíkingin var geymd í læstu herbergi safnsins sem fáir hafa aðgang að og hefur ekki verið opnað í þrjá mánuði. Engin ummerki voru um innbrot og því má gefa sér að gerandinn hafi ekki verið einn að verki.