Ellis Murphy-Richards lést einungis viku fyrir 16 ára afmælið sitt þegar hann féll af brú í Englandi. Móðir hans óttast að samfélagsmiðillinn TikTok hafi átt stóran hluta í andláti sonar síns.
Natasha Murphy, móðir Ellis, kallar nú eftir því að samfélagsmiðillinn verði rannsakaður sem hluti af andláti sonar síns. Hún segir að sjálfsmorðshugsanir gætu hafa komið frá forritinu, hún trúir að efnið sem hann sá á samfélagsmiðlinum hafi dregið hann til dauða. TikTok er einn vinsælasti samfélagsmiðill heimsins í dag en hann er til að mynda afar vinsæll meðal ungmenna hér á landi.
Ellis átti að vera á leiðinni á geðdeild á barna- og unglingasjúkrahúsi á Englandi. Hann mætti í tíma áður en hann átti að vera lagður inn en sagt er að þar hafi komið upp einhver ágreiningur. Ellis bjó hjá ömmu sinni en hún segir hann hafa gengið út eftir að hafa neitað að fara í innlögn á geðdeildina.
„Við erum öll í molum,“ sagði móðir Ellis í kjölfar andlátsins. „Ellis var mjög listrænn og tónlistin var allsráðandi í honum. Hann lærði að spila á nefflautu, fór í tíma til að læra á fiðlu og átti sinn eigin gítar. Hann lærði síðan breska táknmálið svo hann gæti sungið það með popp lögum.“
Skilin voru eftir blóm og 16 ára afmælisblaðra á brúnni fyrir Ellis eftir að hann lést. Þá skildi móðir hans eftir kort þar sem hún sagðist vita hversu mikið hann langaði að fagna 16 ára afmælinu sínu. „Þetta er ekki eins og þetta átti að vera. Kannski sagði ég það ekki nógu oft en ég var alltaf stolt af þér. Ég vildi bara að þú værir hamingjusamur. Ég hefði alltaf staðið með þér, sama hvaða leið þú hefðir valið.“