Nýlega var tilkynnt að Harry Bretaprins væri að gefa út sjálfsævisögu en þær fréttir fara ekki vel ofan í bresku konungsfjölskylduna. Samkvæmt The Mirror hefur þetta valdið „flóðbylgju af ótta“ í Buckinghamhöll.
Talið er að Harry muni opna sig enn meir um hvernig komið var fram við hann og Meghan Markle, eiginkonu hans, á meðan þau voru enn hluti af konungsfjölskyldunni. Eins og frægt er hafa þau nú þegar rætt þessi mál í afar umdeildu viðtali hjá Oprah Winfrey en viðtalið er meðal annars tilnefnt til Emmy-verðlauna.
Harry segist ekki skrifa þessa bók sem prins heldur sem „maðurinn sem hann er orðinn“ eins og hann orðaði það í tilkynningu.
„Ég vona að með því að segja mína sögu, hápunktana og lápunktana, mistökin og það sem ég hef lært, geti ég sýnt að það skiptir engu máli hvaðan við komum. Við eigum meira sameiginlegt en við höldum,“ segir Harry.
Konungsfjölskyldan vissi ekki af bókinni fyrr en hún var tilkynnt fyrir öllum umheiminum og segja heimildarmenn The Sun úr Buckinghamhöll að þetta hafi komið öllum verulega á óvart.
Harry á að hafa reynt að koma skilaboðum um bókina áleiðis til fjölskyldu sinnar en án árangurs.