Hluti af risastórri eldflaug, sem Kínverjar notuðu til að skjóta fyrsta hluta Tianhe geimstöðvarinnar á loft þann 29. apríl, er nú stjórnlaus á braut um jörðina og mun hrapa til jarðar fyrr eða síðar. Óttast er að eldflaugin geti valdið tjóni þegar hún hrapar til jarðar.

Samkvæmt frétt The Guardian var Long March 5B eldflaug skotið á loft þann 29. apríl með hluta af nýrri geimstöð Kínverja og kom honum á braut um jörðina. Eldflaugin, sem var 30 metrar á hæð, fór síðan sjálf á braut um jörðina en í mun minni hæð. Það stefnir því í að koma eldflaugarinnar inn í gufuhvolfið verði algjörlega stjórnlaus en aldrei fyrr hefur svo stór manngerður hlutur komið stjórnlaust inn í gufuhvolfið en hann vegur um 20 tonn.

„Þetta lítur hugsanlega ekki vel út. Síðast þegar þeir skutu Long March 5B eldflaug á loft endaði það með því að stór málmstykki hröpuðu niður og skemmdu fjölda bygginga á Fílabeinsströndinni,“ sagði Jonathan McDowell, stjarneðlisfræðingur við Harvard háskólann. „Megnið brann upp en risastór málmstykki hröpuðu til jarðar. Við vorum mjög heppin að enginn meiddist,“ sagði hann einnig.

SpaceNews segir að áhugamenn á jörðu niðri hafi séð að eldflaugin sé stjórnlaus og snúist. Það og hraði hennar gerir að verkum að ekki er hægt að spá fyrir um hvar er líklegast að hún komi niður þegar aðdráttarafl jarðarinnar dregur hana til sín. McDowell sagði að líklegast sé að hún lendi í sjónum því hafið þekur 71% af yfirborði jarðarinnar.