Strax eftir að tilkynnt var um dauða Filippusar prins á föstudaginn hóf BBC, ríkissjónvarp Breta, 24 tíma útsendingu honum til heiðurs. Sýndir voru ýmsir þættir þar sem farið var yfir líf Filippusar, sem var giftur Elísabetu drottningu í heil 73 ár.
Þetta vakti mikla reiði meðal breskra sjónvarpsáhorfenda því allt efni sem hefði átt að vera sýnt á þessum 24 tímum var frestað. Meðal þátta sem frestað var, var úrslitaþáttur MasterChef og voru aðdáendur þáttarins verulega ósáttir.
Sjónvarpsstöðin setti nýtt met þar sem yfir hundrað þúsund kvartanir bárust þeim á þessum tíma. Metið fyrir það var 63.000 kvartanir sem sjónvarpsstöðin fékk árið 2005 þegar upptaka af Jerry Springer: The Opera var sýnd. Sýningin fór verulega fyrir brjóstið á kristilegum hópum en mikið ósætti var með hvernig kristnu fólki var lýst í henni.
