New York Times skýrir frá þessu. Mary Trump er dóttir Fred Trump Jr., eldri bróður forsetans, sem lést 1981 aðeins 42 ára að aldri. Það var áfengissýki sem varð honum að bana.
Forsetinn er vanur að óþægilegar bækur, þar sem hann er afhjúpaður, séu gefnar út en þetta er í fyrsta sinn sem einhver úr fjölskyldu hans skrifar slíka bók. Nýlega kom út bók eftir John Bolton, fyrrum þjóðaröryggisráðgjafa Trump, þar sem ófagrar lýsingar koma fram á forsetanum og starfsháttum hans. Hann er sagður algjörlega óhæfur til að gegna forsetaembættinu og að hann hafi notað það til að vinna í eigin þágu, hagsmunir þjóðarinnar sitji á hakanum. Trump reyndi að stöðva útgáfu Bolton en það tókst ekki.
Í bók sinni skýrir Mary Trump frá hvernig „einstakir atburðir og fjölskyldumynstur hafi skapað ónýtan mann sem sitji í dag í Hvíta húsinu“. Þar vísar hún til „undarlegs og eitraðs sambands Fred Trump við tvo elstu syni sína, Fred Jr. og Donald.“ Hún lýsir áföllum, eyðileggjandi samböndum og hörmulegri blöndu vanrækslu og ofbeldis“ að því er segir í tilkynningu frá útgáfufélagi bókarinnar.
Um leið og fréttist af bókaskriftunum sagði Trump að hann væri reiðubúinn til að draga frænku sína fyrir dóm. Hann sagði að hún hafi skrifað undir þagnarákvæði árið 2001 sem banni henni að tjá sig um einkamálefni Trump-fjölskyldunnar. Robert Trump, yngri bróðir Donald, kom honum til aðstoðar í vikunni þegar hann reyndi að stöðva útgáfu bókarinnar á grunni fyrrnefnds þagnarákvæðis.
Dómari varð við kröfu hans en áfrýjunardómstóll sneri úrskurðinum við og því verður hægt að gefa bókina út.
