Í apríl missti Betty Canales vinnuna hjá stóru fyrirtæki í Dallas. Um leið missti hún sjúkratrygginguna sína. Hún er með sykursýki og fer til læknis á þriggja mánaða fresti. Insúlínið kostar hana sem svarar til um 130.000 íslenskra króna á hverjum ársfjórðungi. Í samtali við Texas Tribune sagðist hún vera áhyggjufull því hún viti ekki hvernig hún á að greiða fyrir lyfin sín.
Miklu fleiri eru í svipaðri stöðu og hún en rúmlega 40 milljónir hafa misst vinnuna eftir að heimsfaraldurinn skall á og 27 milljónir misstu um leið sjúkratryggingar sem vinnuveitendur þeirra greiddu. Þetta er mat Kaiser Family Foundation, bandarískrar hugveitu sem sérhæfir sig í heilbrigðismálum.
Margir geta skipt yfir í tryggingar sem hið opinbera styður við. Í mörgum ríkjum geta þeir fátækustu notið tryggingar sem nefnist Medicaid en þurfa samt sjálfir að greiða hluta af kostnaði við heilbrigðisþjónustu. Þeir sem eru aðeins betur staddir geta nýtt sér Obamacare. Mikill munur er á skilyrðunum, til að fá að njóta þessarar þjónustu, á milli einstakra ríkja og milljónir manna munu ekki fá aðgang að neinum sjúkratryggingum. Þetta á til dæmis við í Texas og Flórída.
Margir munu því eflaust gleðjast yfir Obamacare nú en það kerfi hefur verið mikið bitbein stjórnmálamanna á undanförnum árum en nú veitir það atvinnulausu fólki ákveðið öryggi. Þetta er ákveðinn höfuðverkur fyrir repúblikana sem hafa lengi reynt að leggja Obamacare niður og láta nú reyna á það fyrir dómstólum en málið er nú hjá Hæstarétti.