Barn sem var statt í mótmælum í miðbæ Seattle-borgar, Bandaríkjunum fékk piparúða í andlitið frá lögreglu á dögunum. Myndbandsupptaka er til af atvikinu, en þar má sjá barnið þjást af völdum piparúðans. The Stranger greinir frá þessu. Varað er við því að mynbandið er ekki fyrir viðkvæma.
Á myndbandinu sést hvernig mótmælendur reyna að hlúa að barninu með því að hella vatni og mjólk í augu þess. Þá hefur annað myndband birst, þar sem að mótmælendur ásaka lögreglu um athæfið og spyrja hvers vegna barnið hafi verið úðað. Lögregluþjónarnir svara því ekki.
Líkt og flestir vita þá standa nú yfir mikil mótmæli um öll Bandaríkin. Mótmælin standa yfir vegna þess að lögreglumaðurinn Derek Chauvin drap George Floyd sem var svartur á hörund. Chauvin þrýsti með hné sínu að hálsi Floyd sem lá á jörðunni og kafnaði í kjölfarið. Tíu mínútna upptaka er til af atvikinu. Mótmælin sem nú geisa varða rótgróna kynþáttafordóma í Bandaríkjunum.