Lík fjölbragðaglímustjörnunnar, Shad Gaspard fannst í morgun á ströndinni við Venice-hverfið í Los Angeles. Þar týndist hann fyrr í vikunni eftir að hafa lent í miklum og erfiðum öldugangi, er hann fór að synda með syni sínum. Frá þessu greinir ESPN.
Lögreglan var kölluð á svæðið þegar að vegfarandi sá lík reka á land segir í skýrslu lögreglu, sem að bar kennsl á að um væri að ræða lík Shad Gaspard. Gaspard var 39 ára.
Hann og sonur hans Aryeh, sem er tíu ára fóru að synda og lentu í erfiðum aðstæðum vegna mikils öldugangs. Strandverður fór að bjarga feðgunum, en vegna erfiðra aðstæða var erfitt að bjarga þeim báðum.
„Bjargaðu syni mínum“ á Shad að hafa sagt við strandvörðinn sem kom syninum heilum á húfi aftur á ströndina. Þegar hann ætlaði að snúa við og bjarga Shad, þá sá vörðurinn risastóra öldu sem ýtti Shad lengst í burtu. Hann sást ekki aftur á lífi eftir það.
Eiginkona Shad, Siliana Gaspard, gaf út yfirlýsingu á þriðjudag þar sem að hún þakkaði lögreglu fyrir hjálpina og aðdáendum fyrir stuðninginn.
Shad var vinsæll fjölbragðaglímumaður hjá WWE-samtökunum. Hann hætti í þeim bransa árið 2010 og snéri sér að öðrum verkefnum. Hann lék til dæmis í sjónvarpsþáttum og bíómyndum, til að mynda í kvikmyndinni Get Hard frá árinu 2015 sem skartaði þeim Kvein Hart og Will Ferrell.
