Norskt samfélag er að stórum hluta í „pásu“ vegna COVID-19 faraldursins og fólk er hvatt til að halda sig heima til að draga úr útbreiðslu sjúkdómsins. Það er ekki að sjá að Norðmönnum leiðist mikið heima við því sala á kynlífsleikföngum hefur slegið öll met.

TV2 hefur eftir talskonu kynlífstækjaverslunarinnar Kondomeriet að fólk fylgi ráðleggingum yfirvalda og haldi sig heima. Þess sjái merki í veltu verslunarinnar sem hafi aukist mikið samhliða fleiri pöntunum en áður.

„Það er mjög gaman að sjá að fólk notar tímann til að kynda undir ástinni, leika sér og fara nýja slóðir. Þegar ekki er hægt að fara á veitingastaði eða í klippingu nota Norðmenn meiri tíma og peninga í kynferðislega vellíðan.“

Þetta á bæði við um einhleypt fólk og fólk í föstum samböndum sagði talskonan.

Frá 12. til 22. mars jókst velta verslunarinnar um 47 prósent miðað við vikuna á undan. Pöntunum í netversluninni fjölgaði um 45 prósent á þessum tíma.