„Við opnum þetta frábæra land. Við neyðumst til þess.“
Sagði hann á þriðjudaginn í viðtali við Fox News.
Í augum margra skýtur skökku við að Trump hyggist opna landið því það er nú meðal þeirra ríkja sem verst hefur orðið úti í faraldrinum. Um 1.000 hafa látist þar í landi og staðfest smittilfelli eru um 70.000.
Staðan er mjög slæm í sumum ríkjum, til dæmis í New York þar sem skortur á öndunarvélum er yfirvofandi.
En Trump lætur peningana ganga fyrir og segir að hann vilji ekki láta þennan banvæna heimsfaraldur „valda langvarandi efnahagsvanda“.
Bandarískt efnahagslíf á í vök að verjast vegna faraldursins eins og víða annarsstaðar er efnahagslífið að stórum hluta lamað. Atvinnuleysi eykst og mun væntanlega verða meira en í kjölfar fjármálakreppunnar 2008.
„Trump er greinilega ekki í tengslum við raunveruleikann.“
Sagði Dr. Tina Tan, hjá Infectious Diseases Society of America, í samtali við CNBC.
„Þetta er upphafið að stórum lýðheilsuhörmungum. Ég veit ekki hvar Trump fær upplýsingar en það skortir mikið á þær.“
Sagði hún einnig.