Sumir vísindamenn vonast eftir betra gengi í baráttunni við COVID-19 eftir því sem vorið sækir í sig veðrið og það fer að hlýna í veðri. Talið er að kjöraðstæður fyrir útbreiðslu veirunnar séu þar sem rakastig er lágt og hitinn á milli 5 og 11 gráður. Það verður því kannski svolítið á brattann að sækja hjá okkur hér á Íslandi á næstunni ef þetta er rétt þar sem veðurfar hér uppfyllir þessi skilyrði ansi oft.

Sumir vísindamenn hafa rætt um að ef COVID-19 hegðar sér eins og aðrar öndunarfærasýkingar þá muni vormánuðurnir og sumarið koma að gagni í baráttunni við veiruna. Niðurstöður sumra rannsókna benda til að veiran muni hegða sér eins og skyldar veirur. Einnig benda niðurstöður rannsókna til að COVID-19 muni eiga erfiðara með að ná fótfestu á hitabeltissvæðum en á tempruðum svæðum.

FT hefur eftir Mohammad Sajadi, hjá veirufræðideild University of Maryland, að miðað við fyrirliggjandi gögn þá virðist veiran eiga erfiðara með að berast á milli fólks á heitum svæðum. Niðurstöður rannsókna kínverskra vísindamanna benda til að „hár hiti og hátt rakastig dragi mikið úr útbreiðslu COVID-19“. Rannsókn Sajadi bendir til að veiran geti smitast allsstaðar en bestu aðstæðurnar fyrir hana séu við lágt rakastig og 5 til 11 gráðu hita.

Eins og er þá eru þau svæði sem verst hafa orðið úti af völdum veirunnar 30 til 50 gráðum norðan við miðbaug, þar sem stærstu hluti Kína og Bandaríkjanna er, og í suðurhluta Evrópu. Sajadi og samstarfsfólk hans telja að útbreiðsla veirunnar muni færast norðar yfir Evrópu og Kanada á næstu vikum en síðan hægi á henni yfir sumarið en á sama tíma færist hún í aukana sunnan við miðbaug.