Markmið æfingarinnar var að sjá hversu vel fyrirtæki, yfirvöld og alþjóðlegar stofnanir gætu starfað saman og tekist á við ímyndaðan „heimsfaraldur sem hefði hugsanlegar hörmulegar afleiðingar“. En slíkur faraldur er ekki lengur bara fræðilegur heldur staðreynd því COVID-19 herjar nú af fullum krafti á heimsbyggðina.
Í umfjöllun New York Magzine um málið kemur fram að COVID-19 faraldurinn sé ótrúlega líkur þeim sem var settur á svið á æfingunni í október en hún nefndist „Event 201“. Í henni fór veira, sem var kölluð CAPS (Coronavirus Associated Pulmonary Syndrome) af stað í brasilískum svínum og barst úr þeim í menn. Úr urðu veikindi sem voru allt frá mildum flensueinkennum yfir í lungnabólgu. Á þremur mánuðum veiktust 30.000 manns af þessari ímynduðu veiru og 2.000 létust.
En þar með er ekki öll sagan sögð því veiran var látin taka á sig mynd heimsfaraldurs og eftir 18 mánuði var staðan sú að 65 milljónir manna höfðu látist. Þá var staðan sú að faraldurinn var farinn að hægja á sér því færri voru móttækilegir fyrir hinni ímynduðu veiru. Þá þótti einnig liggja ljóst fyrir að faraldurinn myndi halda áfram þar til bóluefni væri komið fram eða 80 til 90 prósent mannkyns hefði smitast af veirunni. Eftir það væri líklegast að um barnasjúkdóm yrði að ræða.
Í tilkynningu frá Johns Hopkins Center for Health Security segir að æfingin hafi ekki verið spá, ekki sé verið að spá því að 65 milljónir manna muni láta lífið af völdum COVID-19. Ekki hafi verið gengið út frá sömu aðstæðum í æfingunni og nú eru uppi. Segja vísindamenn að ekki skuli líta á æfinguna sem spá heldur sem verkfæri til að bæta viðbrögð við heimsfaraldri.
