Í Region Syddanmark í Danmörku er skortur á ýmsum hlífðarbúnaði fyrir heilbrigðisstarfsfólk, til dæmis munngrímum og hlífum fyrir andlitið. Til að bregðast við þessu hafa heilbrigðisyfirvöld farið þá leið að kaupa fullt af sundgleraugum. Einnig er verið að skoða hvort hægt sé að nota öryggisgleraugu eins og fólk er hvatt til að nota á gamlárskvöld þegar flugeldum er skotið upp.

COVID-19 veiran berst inn í líkamann í gegnum slímhimnur og því þarf að vernda munn, nef og augu. Af þeim sökum er hlífðarbúnaður mjög mikilvægur til að koma í veg fyrir að heilbrigðisstarfsfólk smitist.

Í síðustu viku hvöttu heilbrigðisyfirvöld starfsfólk í heilbrigðisgeiranum til að fara sparlega með hlífðarbúnað og handspritt ef hægt væri.

Samkvæmt frétt Ekstra Bladet er nú verið að breyta hluta af starfsemi margra danskra iðnfyrirtækja þannig að þau hætti hefðbundinni framleiðslu og fari að framleiða nauðsynlegan búnað fyrir heilbrigðiskerfið. Þannig eru nokkur brugghús hætt áfengisframleiðslu að sinni og framleiða nú handspritt í gríð og erg.