Í byrjun mars fór brúðkaup eitt fram í Úrúgvæ og var 500 manns boðið til veislunnar. Allt fór þetta vel fram en í kjölfarið hefur það varpað töluverðum skugga á þennan góða dag að 44 gestir smituðust af COVID-19 veirunni. Öll smitin hafa verið rakin til sömu konunnar.

The Guardian skýrir frá þessu. Konan, hin 57 ára Carmela Hontou, sem er tískuhönnuður var nýkomin heim frá Spáni og var með háan hita þegar hún mætti í brúðkaupið.

Spánn er eitt þeirra landa sem hefur orðið verst úti af völdum heimsfaraldursins og þar var staðan slæm í byrjun mars. En Hontou ákvað samt sem áður að fara í brúðkaupið þrátt fyrir að vera með hita og þar með einkenni COVID-19. Þegar hún var spurð hvort hún hafi ekki hugleitt að það væri kannski ekki svo góð hugmynd að vera innan um margt fólk svaraði hún:

„Þetta er fáránlegt. Veistu hversu margir voru um borð í flugvélinni á leiðinni heim?“

Hún dró þó ekki úr því að síðustu dagar hafi reynst henni erfiðir. Hún hefur meðal annars verið kölluð „hryðjuverkamaður“ sem hafi komið með veiruna inn í landið „til að drepa fólk“.

Samkvæmt frétt The Guardian á hún saksókn yfir höfði sér fyrir að hafa dreift smitsjúkdómi en það er refsivert samkvæmt hegningarlögum í Úrúgvæ.