COVID-19 faraldurinn hefur haft mikil og neikvæð áhrif á alþjóðlega fjármálamarkaði. Nú ætlar Evrópski seðlabankinn (ECB) að bregðast við því með stórum hjálparpakka. Í gærkvöldi tilkynnti bankinn að hann ætli að nota 750 milljarða evra til að styðja við evrópskt efnahagslíf á næstunni.

Bankinn mun kaupa skuldabréf útgefin af opinberum aðilum sem og einkaaðilum. Margir óttast að alvarleg efnahagskreppa, eins og varð 2008, sé í uppsiglingu vegna COVID-19 og eru aðgerðir ECB liður í því að koma í veg fyrir að svo fari.

Bankinn mun kaupa skuldabréf út árið eða þar til hann telur að kórónuveirukrísan sé afstaðin. Í yfirlýsingu bankans kemur einnig fram að hann sé tilbúinn til að kaupa enn meira ef þörf krefur.

Christine Lagarde, formaður ECB, skrifaði á Twitter að „sérstakir tímar kalli á sérstakar aðgerðir“. Hún sagði engin takmörk vera á skyldum bankans við evruna og að hann sé staðráðinn í að nota öll þau verkfæri sem hann býr yfir.