Þær drápu föður sinn eftir að hann hafði árum saman misþyrmt þeim. Hann neitaði að leyfa þeim að ganga í skóla, beitti þær líkamlegu ofbeldi og nauðgaði.
Daginn, sem þær drápu hann, hafði hann farið með þær eina og eina inn í herbergið sitt. Þar úðaði hann piparúða í andlit þeirra því honum fannst þær ekki hafa staðið sig nægilega vel við að þrífa íbúðina. Þegar hann sofnaði um kvöldið drápu þær hann. Þær hringdu sjálfar í lögregluna og voru handteknar þegar lögreglumenn komu á vettvang.
Systurnar voru 19, 18 og 17 ára þegar þetta gerðist. Ákæran á hendur þeim hratt mikilli umræðu af stað í Rússlandi um heimilisofbeldi en það var gert refsilaust, nema allra grófustu tilfellin, með lögum 2017. Faðir þeirra var þekktur ofbeldismaður, fíkniefnasali og tengdur mafíunni.
Verjendur þeirra og aðgerðasinnar telja að þær hafi neyðst til að drepa föður sinn til að lifa sjálfar af. BBC segir að rúmlega 350.000 manns hafi skrifað undir stuðningsyfirlýsingu við systurnar.
Á föstudaginn skýrðu verjendur þeirra frá því að saksóknarar hafi ákveðið að fella ákæru á hendur þeim niður því það sé mat ákæruvaldsins að þær hafi drepið föður sinn í nauðvörn.
