Danir hafa fest kaup á 27 nýjum orustuþotum af gerðinni F-35 frá Bandaríkjunum. Þær verða afhentar á næstu árum. Samhliða því sem þær verða afhentar verða 43 gamlar og úreltar F-16 orustuþotur hersins teknar úr umferð. En þrátt fyrir að það gerist ekki fyrr en á næstu árum eru margir nú þegar áhugasamir um að kaupa þær.

Trine Bramsen, varnarmálaráðherra, sagði nýlega á þingi að mikill áhugi væri á flugvélunum því þeim hefði verið haldið svo vel við alla tíð. Danska ríkisútvarpið skýrir frá þessu.

Varnarmálaráðuneytið hefur staðfest að til standi að selja flestar vélanna en nokkrum verði haldið eftir til að flugvirkjanemar geti æft sig á þeim og einhverjar fara á söfn.

Fyrstu F-35 vélarnar verða afhentar á næsta ári og þær síðustu 2024.

En áður en hægt er að selja F-16 vélarnar þurfa bandarísk stjórnvöld að samþykkja söluna en kveðið er á um það í kaupsamningi vélanna.